विराटनगर—विराटनगरस्थित कोशी अस्पतालमा एक साताअघि आएका एक बेबारिसे युवाको उपचार प्रभावकारी हुन सकेको छैन् । देब्रे खुट्टामा घाउ बोकेर ओखलढुंगा घर बताउने ३५ वर्षीय शंकर मगर एक साताअघिदेखि अस्पतालको आकस्मिक कक्ष अगाडि बेवारिसे अवस्थामा छन् ।
देब्रे खुट्टा कुहिएर झर्नै लाग्दा पनि उनको उपचार हुन सकेको छैन । ‘म बाँच्न चाहन्छु, उपचार गराइदिनुहोस्,’ उनले भने, ‘मेरो घर ओखलढुंगा हो, आफन्त कोही छैनन् ।’ भारतको हरियाणाबाट फर्कने क्रममा आफूलाई चोट लागेको उनले सुनाए ।
घुँडादेखि तलको भाग कँुहिएको कारणले अस्पतालको आकस्मिक कक्ष वरपर दुर्गन्ध फैलिएको छ । दुर्गन्धका कारण उपचारका लागि जाने बिरामी, अस्पतालका स्वास्थ्यकर्मी तथा कर्मचारी पनि समस्यामा परेका छन् । बिरामीको वरिपरी झिगा भन्किएको छ ।
बेबारिसे अवस्थामा आकस्मिक कक्षको प्रतीक्षालयमा बसेको लामो समय भएपनि ती युवाको प्रभावकारी उपचार हुन सकेको छैन् । अस्पतालले उनको निःशुल्क उपचार सुरु गर्दै एन्टिबायोटिक औषधि पनि चलायो । तर, घाउ ठीक हुनुको साटो उल्टै घुँडादेखि मुनीको भाग कुँहिएको छ ।
घाउ निको नभएपछि उपचारमा संलग्न चिकित्सकले घुँडादेखि तलको भाग काटेर फाल्नुकोे विकल्प नभएको बताएका छन् । अस्पतालका बरिष्ठ हाडजोर्नी तथा नशा रोग विशेषज्ञ डा. यज्ञराज खरेलले औषधिले निको हुन नसके कारण संक्रमण रहेको घुँडादेखि तलको भाग तत्काल काट्नुपर्ने बताए । उनले जतिसक्दो चाँडो काटेर नफाले यसको संक्रमण शरीरका अन्य अंगमा पनि फैलने जानकारी दिए ।
उपभोक्तावादी संस्था पब्लिक फोरमका अध्यक्ष उत्तम ढुँगेलले उपचारमा समस्या भएका बेवारिसेको उपचारमा सम्बन्धित निकायले ध्यान नदिएको बताए । तीन तहका सरकार र विभिन्न सामाजिक नाम दिएर खुलेका संस्था आफ्नै स्वार्थमा केन्द्रीत हुँदा रोगले थलिएका र बेवारिसे बनेकाहरु उपचारबिहीन भएर बस्नु परेको ढुँगेलको भनाइ छ ।
आफन्त र परिवारका सदस्य कोही पनि नभएका युवाको चिकित्सकले भनेजस्तो उपचार गर्न समस्या भइरहेको अस्पतालका सूचना अधिकारी विष्णुबहादुर बुढाथोकीले बताए । ‘खुट्टा काट्नुअघि कानुनी प्रक्रिया पूरा गर्न बिरामी जिम्मा लिने कोही चाहिन्छ,’ उनले भने, ‘सबै कुरा अस्पतालले गरिदिन्छ भन्दा पनि जिम्मा लिने र कुरुवाका रुपमा बस्ने कोही भेटिएनन् ।’ उनले अहिले पनि संक्रमण रोकथामका लागि अस्पतालको सामाजिक सेवा इकाईमार्फत औषधि उपचारलाई भने जारी राखिएको बताए । बुढाथोकीले कोही कसैको अंग काटेर फाल्नुपर्ने जस्तो कुरा भएकाले पनि जिम्मा लिने नभेटिएको हुन सक्ने बताए ।
