काठमाडौं– लकडाउन खुलेयता नेपालमा कोरोना संक्रमितको संख्या दिनानुदिन बढ्न थालेपछि स्वास्थ्य विज्ञहरुले प्रधानमन्त्री केपी शर्मा ओलीलाई लकडाउन गर्ने कि नगर्ने भन्ने विषयमा मिश्रित सुझाव दिएका छन् । कोरोना संक्रमणको जोखिम कम कसरी गर्न सकिन्छ भन्ने विषयमा मंगलबार प्रधानमन्त्री निवास बालुवाटारमा भएको स्वास्थ्य विज्ञहरुबीचको छलफलमा विज्ञहरुले ठोस सुझाव दिन सकेनन् ।
छलफलमा हरेक विज्ञबाट फरक फरक खालका सुझाव प्रधानमन्त्रीलाई आएको छलफलमा सहभागि नेपाल मेडिकल एशोसियसनका अध्यक्ष डा. लोचन कार्कीले जानकारी दिए ।
छलफलका क्रममा कसैले कोरोना संक्रमित बढिरहेकाले कम्तिमा २ हप्ता कडा खालको लकडाउन गर्ने सुझाव दिए भने कसैले अब लकडाउनको विकल्प खोज्नुपर्ने सुझाव दिएका थिए । यस्तै कतिपय विज्ञले हटस्पट क्षेत्रमा कडाई गर्ने र सीमामा हेल्थ डेस्कलाई अझै सक्रिय बनाउने, काठमाडौं उपत्यकामा प्रवेश गर्नेले अनिवार्य क्वारेन्टाइनमा राख्नुपर्ने जस्ता सुझाव प्रधानमन्त्रीलाई दिएका छन् ।
यसैगरी छलफलमा सहभागि डा. रविन्द्र पाण्डेले केही समयका लागि कफ्र्यु लगाउन समेत सुझाव दिएका थिए । मेडिकल एशोसियनका अध्यक्ष डा. कार्कीले स्वास्थ्यकर्मीहरुले जोखिम भत्ता नपाएको र उनीहरुको सुरक्षाको प्रबन्ध दह्रो बनाउनु पर्ने सुझाव दिएका थिए । त्यसैगरी संक्रमित स्वास्थ्यकर्मीहरु बढिरहेकाले बेग्लै अस्पताल तोकिनुपर्ने सुझाव दिएको कार्कीले बताए ।
सो विज्ञसमूहसँगको बैठकमा आमन्त्रण गरिएका पूर्व प्रधानमन्त्री एवं नेपाली कांग्रेसका सभापति शेरबहादुर देउवाले जनताको स्वास्थ्यलाई पैसासँग दाँज्न नहुने भन्दै राज्यले गर्नुपर्ने विकल्पजति सबै गर्न सुझाव दिएका थिए । त्यसैगरी जनता समाजवादी पार्टीका अध्यक्ष महन्थ ठाकुरले लकडाउनलाई व्यवस्थित बनाउनुपर्ने र लकडाउनका कारण मारमा परेका जनतालाई राज्यले भरणपोषण गर्नुपर्ने सुझाव दिएका थिए ।
छलफलमा मिश्रित सुझाव आउनु स्वभाविक भएको भन्दै प्रधानमन्त्री केपी शर्मा ओलीले सबै सुझावलाई अध्ययन गरेर निर्णय लिने बताएका थिए ।
छलफलमा प्रधानमन्त्री कार्यालयका सचिव महेन्द्र गुरागाईंले प्रतिदिन १८ हजार जनासम्मको पिसीआर परीक्षण गर्न सक्नेगरी ल्याब स्थापना गरिएको र हालसम्म ४ लाख जनाको परीक्षण गरिएको रिपोर्ट प्रस्तुत गरेका थिए ।
