बाँके–कोरोना भाइरस (कोभिड—१९) फैलनुअघि गुमनाम रहेको बाँकेको दुर्गम गाउँपालिका नरैनापुरवासीले डेढ वर्षपछि चिकित्सक पाएका छन् । नरैनापुरमा चितवनका चिकित्सक डा. सागर पन्त नरैनापुर पुगेसँगै स्थानीयले खुसियाली मनाएका छन् । गाउँपालिका प्रमुख मोहमद स्तीयाक शाहले डा पन्तलाई फूलमालाले स्वागत गरेका थिए ।
डेढ वर्षअघि कालिकोटका डा. विष्णु पोखरेलको सरुवा भएपछि सो पालिकामा चिकित्सक पुगेका थिएनन् । पालिका प्रमुख शाहका अनुसार डा. पोखरेल त्यहाँबाट गएपछि एचएको भरमा प्राथमिक स्वास्थ्य केन्द्र चल्दै आएको थियो ।
पछिल्लो समय कोरोना संक्रमितको संख्या बढ्दै गएपछि पालिका प्रमुखले प्रदेश सरकार र केन्द्रीय सरकारसँग चिकित्सक माग गरेका थिए । कोरोनाको हटस्पट बनेको नरैनापुरमा एक जनाको ज्यान गएको थियो भने अहिलेसम्म १ सय १८ जनामा संक्रमण पुष्टि भएको छ ।
कोरोनाको महामारीका बेला प्राथमिक स्वास्थ्य केन्द्रले डेढ महिनापछि चिकित्सक पाउँदा आफूहरु अति खुसी भएको सो केन्द्रकी अनमी कैहकशानूर (इरमआयशा) खानले बताइन् ।
‘म यहाँ पोष्टिङ भएको अढाइ वर्ष भयो । झण्डै दुई वर्षदेखि डाक्टर हुनुहुन्नथ्यो,’ उनले हेल्थ आवाजसँग भनिन्, ‘यो महामारीमा यहाँका जनतालाई साथ दिन नयाँ डाक्टर आउनुभएको छ । साह्रै खुसी लागेको छ ।’
