काठमाडौं—कोरोना भाइरस (कोभिड—१९) विश्वव्यापी फैलावटका बेला नेपाल प्रहरी पनि अग्रपंक्तिमा परिचालित छ । कोभिड—१९ नियन्त्रणमा फ्रन्टलाइनरका रुपमा सक्रिय प्रहरीहरु पनि संक्रमित हुन थालेका छन् ।
नेपाल प्रहरीका प्रवक्ता डिआईजी निरजबहादुर शाहीकाअनुसार मंगलबारसम्म देशभरका ३८ जना प्रहरीमा कोरोना संक्रमण पुष्टि भएको छ । जसमध्ये १४ जना प्रहरी कोरोना संक्रमण जितेर घर फर्किसकेका छन् । ‘अहिलेसम्म देशभर हाम्रो संगठनमा संक्रमित संख्या ३८ जना रहेको छ,’ प्रवक्ता शाहीले हेल्थआवाजसँग भने, ‘जसमध्ये १४ जना निको भएर डिस्चार्ज भैसक्नुभएको छ ।’
नेपालमा प्रहरीका सबैभन्दा बढी ११ जना धनुषामा संक्रमित भएका छन् । त्यसपछि बारामा ७ जना प्रहरीमा कोभिड—१९ पुष्टि भएको छ । यस्तै, काठमाडौंमा ४ जना, कन्चनपुरमा ३ जनामा कोभिड—१९ संक्रमण देखिएको छ ।
कपिलवस्तुमा २ जना, सप्तरीमा २ जना, जुम्लामा २ जना, धनकुटा २ जना, सिरहामा २ जना, १ जनामा कोभिड—१९ संक्रमण देखिएको हो । यस्तै, बाँके, सर्लाही, जाजरकोटमा १/१ जनामा कोभिड—१९ संक्रमण देखिएको हो ।
