काठमाडौं—राप्ती स्वास्थ्य विज्ञान प्रतिष्ठान दाङमा १० वेड आईसीयुको सेटअपका लागि अमेरिका नेपाल मेडिकल फाउन्डेसन (एएनएमएफ) ले ६८ लाख २५ हजार २ सय रुपैयाँ आर्थिक सहयोग गरेको छ । स्वास्थ्यमन्त्री भानुभक्त ढकालमार्फत एएनएमएफले बिहीबार प्रतिष्ठानकी उपकुलपति डा. संगीता भण्डारीलाई हस्तान्तरण गरेको हो ।
विभिन्न अस्पतालहरुमा आर्थिक सहयोग गर्दै आएको एएनएमएफले सानो सहयोगले त्यस क्षेत्रका नागरिकले ज्यान जोगाउन सकिने विश्वास लिएको छ । फाउन्डेसन नेपालका अध्यक्ष डा. भुपेन्द्र बस्नेतले आईसीयु अभावका कारण कतिपय बिरामीले अकालमै मृत्युवरण गर्नु परेको भन्दै राप्तीमा दश शैय्या आईसीयुका लागि सहयोग गरेको बताए ।
डा बस्नेतको नेतृत्वमा कोभिड–१९ महामारीका बेला विभिन्न अस्पतालहरुलाई २० करोड बढी मूल्यका मेडिकल सामग्रीहरु सहयोग स्वरुप वितरण गरिएको छ । बस्नेतले सो रकम बाट भेन्टिलेटर २, पेसेन्ट मनिटर २, इसिजी मेसिन १, आईसीयु बेड ४ र डिफ्रिब्रेलेटोर १ जडान हुने बताए ।
त्यस्तै एएनएमएफले कोशी अस्पतालमा १ करोड लागतमा अक्सिजन प्लान्ट निर्माण गर्ने भएको छ । ‘रकम आइसकेको छ । हामी केही दिनमा त्यसको व्यवस्थापन गर्दैछौं,’ डा बस्नेतले भने ।
