वीरेन्द्रनगर–कर्णाली प्रदेश अस्पतालमा कार्यरत चिकित्सकहरुले लक डाउनलाई अझै कडाइका साथ पालना गर्न आग्रह गरेका छन् । एक संयुक्त विज्ञप्ति जारी गर्दै चिकित्सकहरुले नेपालमा कोभिड–१९ विदेशमा जस्तो ठूलो संख्यामा संक्रमण देखिएमा देशको सिमित स्वास्थ्य संरचनाले नधान्ने भन्दैं लकडाउनलाई कडाइपूर्वक पालना गर्न सबै नागरिकलाई आग्रह गरेका हुन् ।
चिकित्सकहरुले कर्णालीमा अहिले पनि ‘कोभिड–१९’ उपचारमा चाहिने अत्यावश्यक साधनहरु नभएकोले सबैलाई सचेत रहन आग्रह गरेका हुन् । चिकित्सकहरुले अहिलेको अवस्थामा अरु उपचार भन्दा पनि भाइसरबाट कसरी जोगिने र अरुलाई कसरी जोगाउने भन्नेमा जोड दिनुपर्ने बताएका छन् ।
उनीहरुले पछिल्लो समयमा ‘कोभिड–१९’ले संसारभरी महामारीको रुप लिइरहेको बेला छिमेकी मुलुक भारतमा पनि यसले ठूलो असर पारेको उल्लेख गर्दै देशको सिमित स्वास्थ्य संरचना, न्यून मात्रामा रहेको स्वास्थ्यकर्मी र स्वास्थ्य संस्थाहरुले यसको रोकथाम र उपचारमा कस्तो भूमिका खेल्छ भन्नेमा आफूहरु नै विश्वस्त नभएको जनाएका छन् ।
साथै चिकित्सकहरुले तत्काल उपचारको लागि चाहिने भनेको माक्स, पन्जा, स्यानिटाइजर र डिसइन्फिकटेन्टजस्ता आवाश्यक सामाग्रीहरुको लक डाउनले गर्दा आपुर्ति बन्द भएको भन्दै बजारमा भएका सामानहरुको पनि कालो बजारीयाको हालीमुहाली भएकोले यो अबस्थामा कर्णालीका चिकित्सकहरु कसरी उपचार गर्न सक्छौ ? भनेर प्रश्न गरेका छन् ।
पछिल्लो समयमा सरकारले लागू गरेको लकडाउनलाई जनमानसमा राम्रोसँग बुझाउन नसक्दा र लागू नभएकोमा चिकित्सकले चिन्ता ब्यक्त गरेका छन् । लकडाउनको बारेमा कसरी हुन्छ सम्बन्धित निकायले राम्रोसँग बुझाउन जरुरी भएको उनीहरुले विज्ञप्ती उल्लेख गरेका छन् ।
