काठमाडौं—पेडियाट्रिक नर्स एसोसिएसन अफ नेपालले स्थापनाको दोस्रो वर्ष अवसर पारेर विभिन्न कार्यक्रमसहित पेड्रियाटिक नर्स सप्ताह मनाइदैं छ । गत फागुन १६ गतेदेखि मनाउन सुरु गरिएको सप्ताहमा २२ फागुनसम्म चल्नेछ ।
फागुन ११ देखि २२ सम्मलाई पेड्रियाटिक सप्ताहको रुपमा सरकारी तहबाटै घोषणा गराउन अभियानका साथ यो सप्ताह सुरु गरिएको संस्थाकी अध्यक्ष अप्सरा पाण्डेले बताइन् । सरकारी तहबाटै घोषणा गराउन गत १६ देखि १८ गतेसम्म सामाजिक संजाल र संचार क्षेत्रबाट क्याम्पेन गरिएको उनको भनाइ थियो ।
त्यसैगरी, सोमबार फिलाेसाेफिस्का नेपाल विद्यालयका नर्सरीदेखि ४ कक्षासम्मका विद्यार्थीको स्वास्थ्य जाँच गरी समस्या देखिएका ४७ जनालाई कान्ति बाल अस्पतालमा थप उपचारका लागि पठाइएको थियो । मंगलबार भने धुलिखेल अस्पतालमा बाल रोग विशेषज्ञहरुसँग वर्कसप गरिएको छ ।
बुधबार पोखरामा वर्कसप गर्ने कार्यक्रम रहेको छ । त्यस्तै दिन थापाथली अस्पतालमा गर्भवती जाँच र व्रेस्ट फिडिङ काउन्सिलिङ दिने कार्यक्रम पनि रहेको पाण्डेले जानकारी दिइन् ।
बिहिवार नेपाल पेड्रियाटिक सोसाइटीसँगको सहकार्यमा सिपिआरआर तालिम संचालन हुनेछ भने २२ गते कान्ति बाल अस्पतालमा रक्तदानसहित विभिन्न कार्यक्रम गरी समापन गरिने तयारी रहेको अध्यक्ष पाण्डेले बताइन् ।
